kisī kī be-ruḳhī kā ġham nahīñ hai
ki itnā rabt bhī ab kam nahīñ hai
na hoshyārī na ġhaflat aur na mastī
hamārā ab koī aalam nahīñ hai
rag-e-jāñ se bhī vo nazdīk-tar haiñ
magar ye fāsla bhī kam nahīñ hai
yahāñ kyā zikr sharm o aabrū kā
ye daur-e-azmat-e-maryam nahīñ hai
fuġhāñ ik mashġhala hai āshiqoñ kā
ye aadat bar-binā-e-ġham nahīñ hai
farishtoñ kī ye shān-e-be-gunāhī
javāb-e-laġhzish-e-ādam nahīñ hai