vo jitne duur haiñ utne hī mere paas bhī haiñ

ye aur baat hai ḳhush haiñ magar udaas bhī haiñ

ye dekhnā hai hameñ kis kā zauq kaisā hai

yahāñ sharāb bhī hai zahr ke gilās bhī haiñ

unhī pe tohmat-e-dīvāngī lagāte ho

jo ittifāq se mahfil meñ rū-shanās bhī haiñ

jo raushnī ke libāde ko oḌh kar aa.e

shab-e-siyāh ke vo mātamī libās bhī haiñ

tum apne shahr meñ amn-o-amāñ kī baat karo

jahāñ sukūñ hai vahāñ log bad-havās bhī haiñ

ġhazal ke saaz haiñ faiz-ul-hasan-'ḳhayāl' jahāñ

vahāñ pe aah ba-lab bhī haiñ mahv-e-yās bhī haiñ