ham vo panchhī jin ke ghar se duur basere hote haiñ

raat ko ḳhvāb ḳhayāl ke lashkar dil ko ghere hote haiñ

soch soch kar mar jaatī haiñ ḳhvāboñ kī ta.abīreñ bhī

ḳhvāb jo tere hote haiñ aur ḳhvāb jo mere hote haiñ

ishq kā hāsil kuchh bhī ho ik nisbat bhī kyā kam shai hai

kuchh naañ kuchh to hote haiñ jo baal bikhere hote haiñ

dil kī sham.eñ jalne do in āñkhoñ ko raushan kar lo

kahte haiñ dil jalte haiñ to duur añdhere hote haiñ

qismat likhtī jaatī hai ham us ko paḌhte jaate haiñ

'arshad' ab to yādoñ hī meñ ghar ke phere hote haiñ