phuul zaḳhmī haiñ ḳhaar zaḳhmī hai
ab ke saarī bahār zaḳhmī hai
merī āñkhoñ se ḳhuun bahtā hai
kis qadar intizār zaḳhmī hai
merī gardan to kaaT dī hai magar
ḳhud bhī vo zul-fiqār zaḳhmī hai
terī haivāniyat pe a insāñ
nazm-e-lail-o-nahār zaḳhmī hai
husn ne aisī zarb maarī hai
ab talak merā pyaar zaḳhmī hai
terī nusrat ko aa nahīñ saktā
terā ye jāñ-nisār zaḳhmī hai
ab kisī par yaqīñ nahīñ hai mujhe
is qadar e.atibār zaḳhmī hai