mahak kaliyoñ kī phūloñ kī hañsī achchhī nahīñ lagtī
tumhāre bin hameñ ye zindagī achchhī nahīñ lagtī
bhale mil jaa.e daulat aur shohrat ham ko duniyā meñ
magar dil ko mohabbat kī kamī achchhī nahīñ lagtī
zarā sī Thes lagne se chhalak paḌte haiñ kyuuñ aañsū
hamesha aañkh meñ itnī namī achchhī nahīñ lagtī
mohabbat ke safar meñ rut bhī aatī hai judā.ī kī
hameñ us vaqt koī bhī ḳhushī achchhī nahīñ lagtī
kabhī to abr ban kar jhuum kar niklo kahīñ barso
ki har mausam meñ ye sanjīdgī achchhī nahīñ lagtī