kashtiyāñ mañjdhār meñ haiñ nāḳhudā koī nahīñ
apnī himmat ke alāva aasrā koī nahīñ
manziloñ kī justujū meñ aa ga.e us moḌ par
ab jahāñ se lauTne kā rāsta koī nahīñ
ham ne pūchhā ḳhud ke jaisā kyā kabhī dekhā kahīñ
muskurā kar us ne ham se kah diyā koī nahīñ
zindagī ke is safar meñ tajraba ham ko huā
saath sab haiñ par kabhī pahchāntā koī nahīñ
rafta rafta umr saarī kaT ga.ī apnī yahāñ
ham ko lekin shahr bhar meñ jāntā koī nahīñ