ab jo uTTheñge to kāñdhoñ pe uThānā hogā

bistar-e-ḳhāk pe phir ham ko sulānā hogā

ham se ujḌe hue logoñ se bhī mil kar dekho

darmiyāñ koī to ik rabt purānā hogā

āḳhirī dhuup haiñ āñkhoñ meñ basā lo varna

phir kahāñ ḳhvāb kisī shab kā suhānā hogā

jab ho isbāt hī ḳhud apnī nafī kā baa.is

dil ko har qaid-e-tamannā se chhuḌānā hogā

terī duniyā kī aziyyat to uThā lī yārab

bojh uqbā kā bhī kyā yuuñ hī uThānā hogā