phir bahār aa.ī mire sayyād ko parvā nahīñ
uḌ ke maiñ pahuñchūñ chaman meñ kyā karūñ par vā nahīñ
jī jalā kar ek bosa māñgte haiñ baar se
aage yā qismat vo dekheñ haañ kare hai yā nahīñ
hasrat o hirmān o yaas o hairat rañj o ta.ab
kyā kahūñ is hijr meñ kyā kyā hai aur kyā kyā nahīñ
har kisī se lag chale kyā zikr hai imkān kyā
ham use pahchānte haiñ ḳhuub vo aisā nahīñ
chaar unsur kī ġhazal 'rañgīñ' kaho tum dūsrī
hai qasam tum ko alī-jī kī ye mat kahnā nahīñ