kisī bahāne bhī dil se alam nahīñ jaatā
ḳhushī to jaane ko aatī hai ġham nahīñ jaatā
kisī ko milnā ho us se to ḳhud hī chal kar jaa.e
ki apne aap kahīñ vo sanam nahīñ jaatā
nishāna us kā hamesha nishāñ pe lagtā hai
go dil ke paar vo tīr-e-sitam nahīñ jaatā
ham apne dā.era-e-kār hī meñ rahte haiñ
nikal ke us se ye bāhar qadam nahīñ jaatā
yahī bahut hai ki qaabū meñ ashk rahte haiñ
ye aur baat ki palkoñ se nam nahīñ jaatā