naqīb-e-baḳht saare so chuke haiñ
bil-āḳhir be-sahāre so chuke haiñ
kisī se ḳhvāb meñ milnā hai shāyad
ki vo gesū sañvāre so chuke haiñ
mujhe bhī ḳhud se vahshat ho rahī hai
sabhī jazbe tumhāre so chuke haiñ
ka.ī māyūs māhī-gīr āḳhir
samundar ke kināre so chuke haiñ
shab-e-tanhā.ī jūñ-tūñ kaT rahī hai
ġham-e-furqat ke maare so chuke haiñ
muqaffal phir se kar lo koTharī ko
'sahar' so jaao taare so chuke haiñ