laboñ pe shikva-e-ayyām bhī nahīñ hotā

zabāñ pe ab to tirā naam bhī nahīñ hotā

kabhī kabhī use sochūñ to soch letā huuñ

kabhī-kabhār ye ik kaam bhī nahīñ hotā

ye mai-kada hai nahīñ mai-kasho ye dhokā hai

yahāñ to nashsha tah-e-jām bhī nahīñ hotā

nahīñ ye dard nahīñ ye zarūr hai kuchh aur

ki us meñ to mujhe ārām bhī nahīñ hotā

vo ajnabī sā ravayya vo dil-shikan andāz

jab un ke hoñToñ pe ilzām bhī nahīñ hotā

tire baġhair masāfat meñ pul-sirāt huā

vo rahguzār jo do gaam bhī nahīñ hotā

'sahar' tum us se mulāqāt kaise karte ho

vo shaḳhs ab to lab-e-bām bhī nahīñ hotā