bijliyāñ pī ke jo uḌ jaate haiñ
vo qayāmat se bhī laḌ jaate haiñ
qalb-e-insāñ kī javāñ hiddat se
aag par aable paḌ jaate haiñ
ishq jab vaqt ko jhiñjhoḌtā hai
hādse kaañp ke jhaḌ jaate haiñ
maqtal-e-zīst se mahshar kī taraf
raqs karte hue dhaḌ jaate haiñ
aah kī zalzala-andāzī se
arsh ke paa.e ukhaḌ jaate haiñ
ham vo insāñ haiñ jo bandoñ ke liye
kibriyā se bhī bigaḌ jaate haiñ