phuul sheroñ kī ravānī meñ chale talvār bhī
bāñsurī kī taan meñ hai nīmche kī dhaar bhī
dil kī dhartī par kapilvastu meñ ḳhaibar chāhiye
aadmī gautam bhī ho aur haidar-e-karrār bhī
dard par hai us ke chaḌhne aur utarne kā madār
dil vo dariyā hai ki hai pāyāb bhī mañjdhār bhī
Taañk de āh-o-bukā meñ shabnamī chiñgāriyāñ
aañkh sāvan kī jhaḌī ho abr-e-ātish-bār bhī
maut aa.e to use pahnā shahādat kā suhāg
maut naḳhl-e-dār bhī hai maut ik muTiyār bhī