āsmānoñ se utar kar mirī dhartī pe birāj

meñ tujhe dūñgā panapte hue gītoñ kā ḳhirāj

dil ke sahrā pe baras chait ke bādal kī tarah

ḳhushk Tiile ko bhī de phūltī sarsoñ kā mizāj

nabz-e-hālāt meñ ab reñg ke chaltā hai lahū

kaash rakh le tū utarte hue dariyā kī laaj

chāñd ban kar zarā insān ke māthe pe ubhar

tere jalvoñ ko tarastā hai ye tārīk samāj

bujhte jaate haiñ sitāroñ ke fanā-rañg kañval

aa sar-e-vaqt pe rakh jhuum ke ḳhurshīd kā taaj