kise ḳhabar ibtidā kī anjām kaun jaane
gumān bātil ḳhayāl sab ḳhaam kaun jaane
tamām lafzoñ kā ek mafhūm kaun samjhe
tamām chīzoñ kā ek hī naam kaun jaane
pujāriyoñ ke liye azal se taḌap rahe haiñ
samay ke pahlū meñ kitne asnām kaun jaane
nikal ke din kī tamāzatoñ se vafā kā sūraj
huā hai ḳhuuñ kis tarah sar-e-shām kaun jaane
udaas jazboñ ke daldalī rāstoñ pe 'ā.alī'
sambhal gayā chal ke gām-do-gām kaun jaane