ek lamha ki mileñ saare zamāne jis meñ
ek nukta sabhī hikmat ke ḳhazāne jis meñ
dā.era jis meñ samā jaa.eñ jahānoñ kī hudūd
aa.ina jis meñ nazar aa.e adam kā bhī vajūd
farsh par arsh kī azmat kī dalīl-e-mohkam
ḳhalq par rahmat-e-ḳhāliq kī sabīl-e-mohkam
dastaras us kī nigāhoñ kī karāñ tā-ba-karāñ
vo tajassus ke liye āḳhirī manzil kā nishāñ
ek tausī.a jo qismat kī lakīroñ meñ rahe
ek tambīh jo bedār zamīroñ meñ rahe