sāqiyā tanz na kar chashm-e-karam rahne de
mere sāġhar meñ agar kam hai to kam rahne de
ishq-e-āvāra ko mahrūm-e-karam rahne de
apne māthe pe shikan zulf meñ ḳham rahne de
tū zamāne ko miTātā hai miTā de lekin
ishq kī raah meñ kuchh naqsh-e-qadam rahne de
mere uljhe hue hālāt ġhanīmat haiñ mujhe
dil kī bātoñ meñ na aa pursish-e-ġham rahne de
āshiyāñ phūñk ke takmīl-e-charāġhāñ kar de
fasl-e-gul aa.ī hai gulshan kā bharam rahne de
zindagī ġham se sañvartī hai nikhartī hai qamar
zindagī ko yūñhī ālūda-e-ġham rahne de