qudrat-e-haq hai sabāhat se tamāshā hai vo ruḳh
ḳhāl-e-mushkīñ dil-e-fir.auñ yad-e-baizā hai vo ruḳh
nuur jo us meñ hai ḳhurshīd meñ vo nuur kahāñ
ye agar husn kā chashma hai to dariyā hai vo ruḳh
phūTe vo aañkh jo dekhe nigah-e-bad se use
ā.īne se dil-e-ārif ke musaffā hai vo ruḳh
bazm-e-ālam hai tavajjoh se usī ke ābād
shahr vīrāñ hai agar jānib-e-sahrā hai vo ruḳh
sāmrī chashm-e-fusūñ-gar kī fusūñ-sāzī se
lab-e-jāñ-baḳhsh ke hone se masīhā hai vo ruḳh
dam-e-nazzāra laḌe marte haiñ āshiq us par
daulat-e-husn ke pesh aane se duniyā hai vo ruḳh
saaya karte haiñ humā uḌ ke paroñ se apne
tere ruḳhsār se dilchasp ho anqā hai vo ruḳh
gul ġhalat laala ġhalat mahr ġhalat maah ġhalat
koī saanī nahīñ lā-sānī hai yaktā hai vo ruḳh
kaun sā us meñ takalluf nahīñ paate har-chand
na murassā na mozahhab na mutallā hai vo ruḳh
ḳhāl-e-hindū haiñ parastish ke liye aa.e haiñ
putliyāñ āñkhoñ kī do but haiñ kalīsā hai vo ruḳh
kaun sā dil hai jo dīvāna nahīñ hai us kā
ḳhat-e-shab-rañg se sarmāya-e-saudā hai vo ruḳh
us ke dīdār kī kyūñ-kar na hoñ āñkheñ mushtāq
dil-rubā shai hai ajab sūrat-e-zebā hai vo ruḳh
tā-kujā sharh karūñ husn ke us ke 'ātish'
mahr hai maah hai jo kuchh hai tamāshā hai vo ruḳh