kyā dilkashī hai anjum-o-ḳhurshīd-o-māh meñ

aise na jaane kitne haiñ is jalva-gāh meñ

jannat ḳhayāl meñ hai na duniyā nigāh meñ

kyā lazzateñ milī haiñ ġham-e-be-panāh meñ

dil ko rahe shu.ūr jo hāl-e-tabāh meñ

me.arāj-e-zindagī hai ġham-e-be-panāh meñ

kyā jaane kyā asar thā kisī kī nigāh meñ

sau husn aa ga.e mire hāl-e-tabāh meñ

mujh se nigāh pher ke kyoñ jā rahe ho tum

merī to zindagī hai tumhārī nigāh meñ

me.ār-e-bandagī-e-bashar hī badal diyā

kuchh riñd aa ga.e the kisī ḳhānqāh meñ

rahmat ko bhī muāvin-e-ġhaflat banā diyā

yuuñ bhī koī na aa.e fareb-e-gunāh meñ

īmān aur kufr kā jhagḌā hī kho diyā

vo jab kabhī samā.e kisī kī nigāh meñ

terī nazar kī ḳhair ho kitne hī aa.ine

TuuTe hue paḌe haiñ mohabbat kī raah meñ

ham donoñ mahv-e-shauq meñ lekin ma.āl-e-shauq

un kī nigāh meñ hai na merī nigāh meñ

aise adab se dekh rahe haiñ vo aa.ina

hāzir ho jaise koī kisī bārgāh meñ

paiġhambarī razā-e-ilāhī hai varna 'kaif'

yāqūb dekh sakte the yūsuf ko chaah meñ