na ho jo un kī tabī.at vafā-shi.ār nahīñ

hameñ to talḳhī-e-daurāñ bhī nāgavār nahīñ

ye zarf zarf kī bāteñ haiñ is kā kyā shikva

hai shukr aap kī nazroñ meñ sharmsār nahīñ

hamīñ ne ḳhuun se sīñchā hai ġhuncha-o-gul ko

bahār kahte haiñ jis ko vo ye bahār nahīñ

nazar nazar hai fasāna nafas nafas shikva

hujūm-e-yās meñ sharminda-e-bahār nahīñ

ḳhizāñ-rasīda bahāroñ kā zikr kyā ho 'kalīm'

hameñ to kuchh bhī mohabbat meñ sāzgār nahīñ