rasm-e-girya bhī uThā dī ham ne
āḳhirī sham.a bujhā dī ham ne
ek mauhūm tasavvur ke liye
ruuh kī aab gañvā dī ham ne
darmiyān-e-dil o gulzār-e-hayāt
ġham kī dīvār uThā dī ham ne
raakh bhī paa.e na koī apnī
ab ke vo aag lagā dī ham ne
sansanāte rahe taare pahroñ
kyuuñ tirī baat sunā dī ham ne
har kaḌī raah meñ har manzil par
tere hī ġham ko sadā dī ham ne
aas ke bujhte hue sho.ale ko
tere dāman se havā dī ham ne
jab tujhe bhūlnā chāhā dal ne
ik na.e ġham kī sazā dī ham ne
koī ġhuncha kisī goshe meñ khilā
baaġh meñ dhuum machā dī ham ne
kaisī ābād thī duniyā 'shohrat'
kaisī sunsān banā dī ham ne