vahm sābit hue sab ḳhvāb suhāne tere

yaad karte haiñ magar log fasāne tere

kaash vo din na kabhī aa.e ki tū aa jaa.e

raas aate haiñ mire jī ko bahāne tere

aisī uftād paḌī apnī ḳhabar bhī na rahī

ham to aa.e the yahāñ rañg jamāne tere

kal chhupā rakhte the ḳhud se bhī mohabbat apnī

aaj aa.e haiñ tujhe daaġh dikhāne tere

ḳhalq kā dhyān haTāte rahe kāñTe kyā kyā

raaz ifshā kiye sab bād-e-sabā ne tere

dard kyā kyā na mile shauq-e-talab se apne

zaḳhm kyā kyā na diye zauq-e-hayā ne tere

juz tire chāhne vaalā thā na un kā koī

lauT kar aa.e na 'shohrat' vo zamāne tere