hāsil-e-intizār kuchh bhī nahīñ
ya.anī anjām-kār kuchh bhī nahīñ
hasrat-e-vasl ke muqābil meñ
kulfat-e-intizār kuchh bhī nahīñ
dasht meñ kuchh nahīñ sarāb to hai
baaġh meñ gul na ḳhaar kuchh bhī nahīñ
kis se apnī shanāḳht lete ho
aa.ina juz ġhubār kuchh bhī nahīñ
dil meñ jhāñko mire agar to khule
dāman-e-tār taar kuchh bhī nahīñ
kaun ham se mile ki paas apne
juz dil-e-dāġhdār kuchh bhī nahīñ
aa nafas do nafas ko mil baiTheñ
saañs kā e'tibār kuchh bhī nahīñ