apnā girya kis ke kānoñ tak jaatā hai
gaahe gaahe apnī jānib shak jaatā hai
pakkā rasta kachchī saḌak aur phir pagDanDī
jaise koī chalte chalte thak jaatā hai
yāroñ aur pyāroñ ke hote hue bhī koī
aatā hai aur saarā shahr mahak jaatā hai
umr kaTī hai shiryānoñ ke kaTte kaTte
maulā kitnā gahrā yā nāvak jaatā hai
koī to hai jo is hañste baste manzar meñ
chupke se āvāz meñ aañsū rakh jaatā hai
chup rahte haiñ log razā kī chādar oḌhe
jaise barf se jhiil kā siina Dhak jaatā hai