hairat se taktā hai sahrā bārish ke nazrāne ko
kitnī duur se aa.ī hai ye ret se haath milāne ko
saat suroñ kī lahroñ pe halkore lete phuul se haiñ
ik mad.hosh fazā suntī hai ik chiḌiyā ke gaane ko
boltī ho to yuuñ hai jaise phuul pe titlī Doltī ho
tum ne kaisā sabz kiyā hai aur kaise vīrāne ko
lekin un se aur tarah kī raushniyāñ sī phuuT paḌīñ
aañsū to mil kar nikle the aañkh ke rañg chhupāne ko
jaise koī jism ke andar dīvāreñ sī toḌtā hai
dekho is pāgal vahshī ko roko is dīvāne ko