kabhī sarāb karegā kabhī ġhubār karegā

ye dasht-e-jāñ hai miyāñ ye kahāñ qarār karegā

abhī ye biij ke mānind phūTtā huā dukh hai

bahut dinoñ meñ koī shakl iḳhtiyār karegā

ye ḳhud-pasand sā ġham hai so ye umiid bhī kam hai

ki apne bhed kabhī tujh pe āshkār karegā

tamām umr yahāñ kis kā intizār huā hai

tamām umr mirā kaun intizār karegā

nashe kī tarah mohabbat bhī tark hotī nahīñ hai

jo ek baar karegā vo baar baar karegā