shaam se gahrā chāñd se ujlā ek ḳhayāl
raat huī aur phir aa pahuñchā ek ḳhayāl
din Duube to dil meñ Dūbtā jaatā hai
sūraj kī mānind sunahrā ek ḳhayāl
mere hisse meñ vo shaḳhs bas itnā hai
tārīkī meñ jaltā bujhtā ek ḳhayāl
jhīleñ aur parinde is meñ rahte haiñ
merī duniyā ek darīcha ek ḳhayāl
āḳhir āḳhir ret meñ gum ho jā.egā
sahrāoñ meñ bahtā bahtā ek ḳhayāl
lagtā hai ki saarī umr ke sāthī haiñ
jañgal suunā suunā rastā ek ḳhayāl