ab aur dam na ghuTe raushnī kā kamre meñ

darīche vā hoñ ujāloñ kī dauḌ puurī ho

jo ḳhvāb aa.eñ to dekhūñ tujhe maiñ jī-bhar ke

ki niiñd aa.e to ḳhvāboñ kī dauḌ puurī ho

koī baḌhā.e zarā āsmān kī vus.at

maiñ chāhtā huuñ parindoñ kī dauḌ puurī ho

kisī azaab se ruk jaa.e raqs qātil kā

gharoñ ko lauTte bachchoñ kī dauḌ puurī ho

maiñ tere hijr ke aalam meñ jī nahīñ saktā

so ab yahī ho ki sāñsoñ kī dauḌ puurī ho