dil ko ab hijr ke lamhāt meñ Dar lagtā hai
ghar akelā ho to phir raat meñ Dar lagtā hai
ek tasvīr se rahtā huuñ muḳhātab ghanToñ
jab bhī tanhā.ī ke hālāt meñ Dar lagtā hai
merī āñkhoñ se mire jhuuT ayaañ hote haiñ
is liye tujh se mulāqāt meñ Dar lagtā hai
lamha-e-qurb meñ lagtā hai bichhaḌ jā.eñge
haath jab bhī ho tire haath meñ Dar lagtā hai
āj-kal maiñ unheñ jaldī hī badal detā huuñ
āj-kal dil ke makānāt meñ Dar lagtā hai
jism kī aag ko bārish se havā miltī hai
saath meñ tū ho to barsāt meñ Dar lagtā hai