sitam meñ taab kam ho to pashemānī meñ rahtī haiñ
mire ġham se mirī ḳhushiyāñ pareshānī meñ rahtī haiñ
tumhārī shakl in āñkhoñ meñ aa jaatī hai din Dhalte
ye donoñ sīpiyāñ phir raat bhar paanī meñ rahtī haiñ
jo dard-e-zaḳhm baḌhtā hai to lutf-andoz hotā huuñ
mirī sab rāhateñ us kī namak-dānī meñ rahtī haiñ
mire andar ke ġham bāhar bhī zāhir hote rahte haiñ
ye dil kī silvaTeñ haiñ jo ki peshānī meñ rahtī haiñ
azal se hai hamārī āñkhoñ meñ paivast ā.īna
so in meñ jhāñkne vaalī bhī hairānī meñ rahtī haiñ
tumheñ maiñ chuum luuñ chhū luuñ zarā ik sharm hai varna
ye saarī justujueñ hadd-e-imkānī meñ rahtī haiñ