zindagī kā safar kaThan hai bahut
chal rahī huuñ magar thakan hai bahut
yuuñ to kahne ko hai sharīk-e-safar
phir bhī lekin akelā-pan hai bahut
go ḳhulūs-o-vafā kā hai paikar
us ke lahje meñ par chubhan hai bahut
yaad oḌhī huī hai us kī yuuñ
laash ko jaise ik kafan hai bahut
zindagī hai ajiib uljhan meñ
jī rahī huuñ magar ghuTan hai bahut
maiñ mukammal kabhī na ho paa.ī
zindagī meñ adhūrā-pan hai bahut
ḳhaak huuñ maiñ zamīñ hai merā nasīb
phir bhī uḌne kī kyuuñ lagan hai bahut
zindagī kis kī yaad meñ 'rūbī'
muddatoñ se tirī magan hai bahut