jañg meñ jā.egā ab merā hī sar jaan gayā
aur hogā na koī sīna-sipar jaan gayā
mujh shanāvar ko Dubo sakte nahīñ donoñ harīf
maiñ bhī tūfān kā dariyā kā hunar jaan gayā
ūñchī parvāz kī himmat bhī to kar le kargas
laakh shāhīn kā andāz-e-safar jaan gayā
aaj talvār huī jaatī haiñ shāḳheñ us kī
jañg honī hai havāoñ se shajar jaan gayā
is ke āñgan meñ bhī miTTī ke sivā kuchh bhī nahīñ
chāñd ke ghar meñ jo pahuñchā to bashar jaan gayā