nazar na aa.e to kyā vo mire qayās meñ hai
vo ek jhuuT jo sachchā.ī ke libās meñ hai
amal se mere ḳhayāloñ kā muñh chiḌhātā hai
vo ek shaḳhs ki pinhāñ mire libās meñ hai
abhī jarāhat-e-sar hī ilaaj Thahrā hai
ki nabz-e-sañg kisī dast-e-be-qayās meñ hai
shajar se saaya judā hai to dhuup sūraj se
safar hayāt kā kis dasht-e-be-qayās meñ hai
zarā jo talḳh ho lahja to koī baat bane
ġharīb-e-shahr magar qaid-e-iltimās meñ hai
tujhe ḳhabar bhī hai ḳhud terī kam-nigāhī kā
ik e'tirāf tire harf-e-nā-sipās meñ hai