koī mujh se judā huā hai abhī
zindagī ek sānehā hai abhī
nahīñ mauqa ye pursish-e-ġham kā
dekhiye dil dukhā huā hai abhī
kal guzar jaa.e dil pe kyā ma.alūm
ishq saada sā vāqi.a hai abhī
baat pahuñchī hai ik nazar meñ kahāñ
ham to samjhe the ibtidā hai abhī
kitne nazdīk aa ga.e haiñ vo
kis qadar un se fāsla hai abhī
saarī bāteñ ye ḳhvāb kī sī haiñ
zindagī duur kī sadā hai abhī
daar par khīñchte haiñ 'aḳhtar' ko
jurm ye hai ki jī rahā hai abhī