mustaqil ab bujhā bujhā sā hai

āḳhir is dil ko ye huā kyā hai

tum ko chāhā baḌā qusūr kiyā

tum hī batlā do ki ab sazā kyā hai

maañg luuñ un kā dil agar vo kaheñ

qatl kā tere ḳhūñ-bahā kyā hai

kyuuñ nafas meñ kabāb kī bū hai

mere siine meñ ye jalā kyā hai

mohr hai sabt qalb-e-vā.iz par

daaġh māthe pe bad-numā kyā hai

hazrat-e-dil haiñ kyuuñ udaas udaas

nā-ummīdī ne kuchh kahā kyā hai

kaafī ik lafz hai huzūr-e-ḳhudā

ye shab-o-roz iltijā kiyā hai

vahī māñgo ki ho duā maqbūl

yaanī allāh chāhtā kyā hai

dekhiye ye kalām-e-mehdī meñ

fikr insāñ kī intihā kyā hai

maiñ ne āñkhoñ se ashk poñchhe the

rañg dāman pe laal sā kyā hai

zaat 'mehdī' kī phir ġhanīmat hai

gar vo achchhā nahīñ burā kyā hai