tūfān kī ummīd thī āñdhī nahīñ aa.ī
vo aap to kyā us kī ḳhabar bhī nahīñ aa.ī
kuchh āñkhoñ meñ to ho gayā ābād vo chehra
kuchh bastiyoñ meñ aaj bhī bijlī nahīñ aa.ī
har roz palaT aate the mehmān kisī ke
har roz ye kahte the ki gaaḌī nahīñ aa.ī
vo aag bujhī to hameñ mausam ne jhiñjhoḌā
varna yahī lagtā thā ki sardī nahīñ aa.ī
shāyad vo mohabbat ke liye Thiik nahīñ thā
shāyad ye añgūThī use puurī nahīñ aa.ī