saath saath ahl-e-tamannā kā vo muztar jaanā
allāh allāh tirā bazm se uTh kar jaanā
rahbarī kar ke mirī ḳhizr bhī chakkar meñ paḌe
ab unheñ jalva-gah-e-yār meñ akasr jaanā
dāġh-e-kam-hauslagī dil ko gavārā na huā
varna kuchh hijr meñ dushvār na thā mar jaanā
sādgī se ye gumāñ hai ki bas ab rahm kiyā
mutma.in huuñ ki mujhe aap ne muztar jaanā
nashshe meñ bhī tire 'beḳhud' kī ta.allī na ga.ī
bāda-e-hosh-rubā ko mai-e-kausar jaanā