vo koī aur na thā chand ḳhushk patte the

shajar se TuuT ke jo fasl-e-gul pe ro.e the

abhī abhī tumheñ sochā to kuchh na yaad aayā

abhī abhī to ham ik dūsre se bichhḌe the

tumhāre ba.ad chaman par jab ik nazar Daalī

kalī kalī meñ ḳhizāñ ke charāġh jalte the

tamām umr vafā ke gunāhgār rahe

ye aur baat ki ham aadmī to achchhe the

shab-e-ḳhamosh ko tanhā.ī ne zabāñ de dī

pahāḌ gūñjte the dasht sansanāte the

vo ek baar mire jin ko thā hayāt se pyaar

jo zindagī se gurezāñ the roz marte the

na.e ḳhayāl ab aate haiñ Dhal ke aahan meñ

hamāre dil meñ kabhī khet lahlahāte the

ye irtiqā kā chalan hai ki har zamāne meñ

purāne log na.e aadmī se Darte the

'nadīm' jo bhī mulāqāt thī adhūrī thī

ki ek chehre ke pīchhe hazār chehre the