qalam dil meñ Duboyā jā rahā hai
nayā manshūr likkhā jā rahā hai
maiñ kashtī meñ akelā to nahīñ huuñ
mire hamrāh dariyā jā rahā hai
salāmī ko jhuke jaate haiñ ashjār
havā kā ek jhoñkā jā rahā hai
musāfir hī musāfir har taraf haiñ
magar har shaḳhs tanhā jā rahā hai
maiñ ik insāñ huuñ yā saarā jahāñ huuñ
bagūla hai ki sahrā jā rahā hai
'nadīm' ab aamad aamad hai sahar kī
sitāroñ ko bujhāyā jā rahā hai