gumāñ mehr-e-daraḳhshāñ kā huā hai rū-e-raushan par

ta.ajjub ek aalam ko hai kyā kyā un ke joban par

paḌhī jab fātiha to paḌhte paḌhte hañs diyā goyā

girā.ī aap ne bijlī jab aa.e mere madfan par

hamārā dil dukhānā kuchh hañsī yā khel samjhe ho

samajh pakḌo javāñ ho ab na jaao tum laḌakpan par

suḳhan ko aap ke ai hazrat-e-dil kis tarah mānūñ

kisī ko e.atibār aatā nahīñ hai qaul-e-dushman par

hamārī aañkh se girte nahīñ ye ashk ke qatre

nichhāvar karte haiñ motī tumhāre rū-e-raushan par

nazar meñ jaise 'shīrīñ' ke tumhārā rū-e-raushan hai

nahīñ paḌtī hai aañkh us kī gul-e-shādāb-e-gulshan par