jigar se jaan se pyāre kahāñ hai kuchh to batā
har ek dil ke sahāre kahāñ hai kuchh to batā
tirī talāsh meñ khoī huī hai chashm-e-falak
zamīñ ke rāj-dulāre kahāñ hai kuchh to batā
masarratoñ se thā labrez dil kā paimāna
mirī ḳhushī ke sahāre kahāñ hai kuchh to batā
jo tū nahīñ hai to phailī huī hai tārīkī
mire chamakte sitāre kahāñ hai kuchh to batā
dil-e-'ra.īs' ko hai kaif-e-zindagī kī talāsh
hayāt-e-nau ke ishāre kahāñ hai kuchh to batā