ye zard chehra ye dard-e-paiham koī sunegā to kyā kahegā
zarā se dil meñ hazār-hā ġham koī sunegā to kyā kahegā
na qahqahoñ ke hī silsile haiñ na dostoñ meñ vo rat-jage haiñ
har ik se milnā kiyā hai kam kam koī sunegā to kyā kahegā
bichhaḌne vāloñ kā ġham na kiije ḳhud apne uupar sitam na kījiye
udaas chehra hai aañkh pur-nam koī sunegā to kyā kahegā
tū sirf apnī ġharaz kī ḳhātir ye jalte dīpak bujhā rahā hai
magar zarā ye to soch hamdam koī sunegā to kyā kahegā
balā.eñ kitnī bhī aa.eñ sar par 'ra.īs' ġham kī na kiije shohrat
ye āh-o-zārī ye shor-e-mātam koī sunegā to kyā kahegā