har ik manzar badaltā jā rahā hai
ye lamha bhī guzartā jā rahā hai
tirā ehsās ik muddat se merī
rag-o-pai meñ utartā jā rahā hai
shikāyat zindagī se karte karte
vo ik ik lamha martā jā rahā hai
paḌā hai jab se terā aks is meñ
ye ā.īna sañvartā jā rahā hai
varaq yādoñ ke kis ne khol Daale
mirā kamra mahaktā jā rahā hai
ye duniyā to simaTtī jā rahī hai
magar insāñ bikhartā jā rahā hai