jaane kyā soch ke ham tujh se vafā karte haiñ
qarz hai pichhle janm kā so adā karte haiñ
kyā huā jaam uThāte hī bhar aa.iiñ āñkheñ
aise tūfān to har shaam uThā karte haiñ
dil ke zaḳhmoñ pe na jaao ki baḌī muddat se
ye diye yūñhī sar-e-shām jalā karte haiñ
kaun hai jis kā muqaddar na banī tanhā.ī
kyā huā ham bhī agar tujh se gilā karte haiñ
rishta-e-dard kī mīrās milī hai ham ko
ham tire naam pe jiine kī ḳhatā karte haiñ