saa.e haiñ gosh-bar-āvāz zarā āhista
moniso aaj kī shab zikr-e-vafā āhista
chāñd ke paañv ruke tham ga.e uḌte bādal
zikr kis āriz-o-gesū kā chalā āhista
kitne din aa.e kafan oḌhe hue ḳhvāboñ kā
shab ne kholī tirī yādoñ kī qabā āhista
kyā ḳhabar agle baras ajnabī ho jaa.eñ ham
TūTte jaate haiñ paimān-e-vafā āhista
aaj phir zaḳhm-e-tamannā se mahak uThtī hai
koī paiġhām liye aa.ī sabā āhista
aañkh ne dekhā na ho dil to magar jaane hai
kaun detā hai darīchoñ pe sadā āhista