junūñ gar baḌh gayā rusvā.iyāñ barbād kar deñgī
na yuuñ pīchhe chalo parchhā.iyāñ barbād kar deñgī
tumheñ zid hai akele hī chaloge soch kar dekho
ye kuchh āsāñ nahīñ tanhā.iyāñ barbād kar deñgī
purāne zaḳhm aise khol kar rakhne se kyā hāsil
ye apne par sitam-ārā.iyāñ barbād kar deñgī
ḳhushī meñ kyā hai jo ġham meñ nahīñ kyā baat kah Daalī
tumheñ ye ilm kī gahrā.iyāñ barbād kar deñgī
ġhazal sachchī kaho achchhī kaho jo dil ko chhū jaa.e
'tapish' ye qāfiya-paimā.iyāñ barbād kar deñgī