khiḌkiyāñ sab band kamroñ aur dālānoñ ke biich

baT ga.e parivār āḳhir saiñkaḌoñ ḳhānoñ ke biich

mujh ko duniyā jaan letī thī kisī ke naam se

vāqiye gum ho ga.e haiñ jaise afsānoñ ke biich

maiñ huuñ chhoTā tū baḌā hogā maiñ kaise maan luuñ

ab yahī charchā hai apnoñ aur begānoñ ke biich

ik taraf tark-e-ta.alluq ik taraf hai us kī yaad

hai kahāñ āsāñ guzarnā aise tūfānoñ ke biich

kho diyā har shaḳhs ne bīnā.ī kā radd-e-amal

ek chuTkī dhuup hī pheñkī thī dīvānoñ ke biich