rātoñ meñ jab sunī kabhī shahnā.ī der tak
rag-rag meñ tere ġham ne lī añgḌā.ī der tak
sunte haiñ bazm-e-yār meñ chehre utar ga.e
kis ne vafā kī dāstāñ dohrā.ī der tak
ziine se āsmāñ ke utar aa.ī chāñdnī
āñgan meñ aa ke baiThī to sustā.ī der tak
ik muḳhtasar se lamhe ne pahchān chhīn lī
yuuñ to rahī hai un se shanāsā.ī der tak
miT miT ke naqsh dil pe ubharte rahe 'tapish'
zaḳhmoñ se kheltī rahī purvā.ī der tak