aks har tarah ke ḳhush ho ke hameñ piine haiñ

ham bhī dīvāroñ pe laTke hue ā.īñe haiñ

tairtī kaa.ī ke TukḌe ye sadā dete the

chaak nadiyoñ ke garebān hameñ siine haiñ

khā ga.ī un ko bhī āḳhir mire māhaul kī dhuup

jaltī shāḳhoñ se bhī kuchh saa.e agar chhīne haiñ

sīḌhiyāñ dil ke taqāzoñ kī chaḌhoge kab tak

jin kā āḳhīr nahīñ hai ye vahī ziine haiñ

kyā ḳhabar thī ki ujāle nahīñ deñge 'nudrat'

vo sitāre jo añdheroñ ke liye chhīne haiñ