rahe raqīb se bāham vo sīm-bar mahzūz
huā na aah kā apne kabhī asar mahzūz
dareġh chashm-e-karam se na rakh ki ai zālim
kare hai dil ko mire terī yak nazar mahzūz
na baar baar havas ho nabāt kī mujh ko
rakhe jo ek hī bosa meñ lab-e-shakar mahzūz
tamāsha ek ḳhudā.ī kā ham dikhāte haiñ
to kījiye banda-navāzī hue ho magar mahzūz
yahī duā hai ki 'chandā' kā dil alī valī
tere karam se rahe shaam aur sahar mahzūz